《不再自我,為主而活》 梁佩雯

我自細在一個單親家長大,算係半個基督教嘅家庭長大(婆婆、公公、有幾個姨媽係基督徒)。所以自細都有返過教會,因為係單親家庭長大,所以我比其他小朋友更反叛 ,當時媽咪覺得無辦法照顧我,所以我經常去唔同嘅宿舍住,亦試過入女童院!直到中學我唔再需要住宿舍開始,我慢慢學壞。因各種原因令到我有抑鬱同自殺傾向,慢慢更踏入吸毒嘅路上。當時我係同朋友去玩先會食下,但再加上開始要同媽咪两個人去承擔屋企所有開支,我亦係當時選擇咗一份唔太正經既工作,雖然搵好多錢,但一啲都唔開心,直到我識到一個比我大好多既男人,佢亦因為我慢慢開始染上吸毒嘅習慣,當時佢話會好好照顧我,點知一年之後佢因為毒品而出賣我,亦因為呢件事令到我既抑鬱自殺傾向再次走出黎,呢件事之後我更加唔信我身邊既所以有人包括我自己媽咪。所以一直都靠自己同毒品去渡過自己既每一日,直到我識到另一個男仔,我地好快拍拖,佢本身都係吸毒者,所以大家累鬥累咁過每一日,亦因為食毒品要好多錢,我就連買賣毒品都做埋,其實當時我知道媽咪一直係好旁惶無助,亦知道佢每個星期日返教會好好去為我祈禱,我亦相信神聽到媽咪既禱告。所以大約過左半年既生活,突然有一日我好似叮一聲咁覺得自己唔可以再咁落去,我要有好既身體先可以同當時既男朋友去結婚生BB,過正常人過既生活,所以係個一刻,我係媽咪面前倒哂所有毒品,並同媽咪講我以後唔會再食,唔會再令你傷心。我就從個一刻開始冇再食毒品。我係靠著自己同神既意志去戒毒,係呢段時間真係好難受,心癮問題,身體上既問題等等,我一直好努力咁去戒,但原來我身邊個個仲不斷繼續吸毒。好彩呢段時間我一直都有堅持住同媽咪返教會,去親近神。所以我先可以繼續咁堅定唔再吸。雖然係呢半年裡面我都有好多唔同既誘惑,令到我好想食返,例如自己肥左好多,好多唔開心。最重要係2011年我爸爸發現自己有末期肺癌,當時既我其實本身應該仲好憎我爸爸同爸爸既太太(因為係佢地令到我有一個咁唔完整既家),但因為信主之後,主耶穌係聖經入面令到我學識真正既愛,包容,寬恕,因為每個人都曾經係罪人,但耶穌基督都依然咁愛我地每一個。所以我決定同媽咪去再見爸爸一家,爸爸病既時間我一直都有為到佢去祈禱,每當我見到佢辛苦既時候我一直為佢祈禱,我好記得有一次爸爸痛到神智不清既時候,我祈禱:神呀!雖然爸爸未係一心堅定去跟隨你,但同樣係你既兒女,求你唔好再讓到爸爸受到呢啲既折磨,讓到佢可以清醒甘去走埋佢人生上既路,求你減輕佢既痛楚!Amen!

 

雖然係一個好簡短既禱告,但神真係聽到孩子所想既,無幾耐爸爸就清醒返,亦感覺舒服咗好多亦無咁痛了。之後無幾耐爸爸就離世了,當爸爸剛斷氣時,我當時既男朋友竟然係醫院食大咗,個刻我又傷心又嬲!但感謝主繼續我既身心都支持住我!無比我係我最傷心既時候做錯事行返之前既路!我相信係神既帶領,所以開始覺得佢冇為我而去諗將來,諗去戒毒,個一刻我怕會被佢再令我自己既定力唔夠,所以我決定分手。無幾耐我就認識到我依家既老公,我同我老公一齊咗無耐就結婚喇,所以我更加相信一切既事情都係主去為我挑選,挑選出最好最合適既比孩子!特別係認識主耶穌之後我發現自己既抑鬱同自殺傾亦慢慢消失左,亦開始向身邊未信主既朋友講下主耶穌,亦嘗試慢慢叫下佢地反教會!我相信日後我可以再為主做更多既事!

 

本頁圖片/檔案 - 323333

播道會得勝堂 - 得勝崇拜更新

本堂崇拜實體聚會

週二崇拜:

土瓜灣浙江街46-50號明發大廈一樓(樂泉堂)

港鐵土瓜灣站C出口  

星期二 - 下午8時至9時30分

 

週日崇拜:

紅磡鶴園街2G號恆豐工業大廈一期二樓A1-208室  

星期日 - 上午10時30分至12時

 

如有問題, 請致電教會辦公室 2356 7300 聯絡幹事

歡迎會友積極參與崇拜,到時大家見面,互勉祝福!