我最初認識主耶穌是在小學，家住藍田。小時讀基督教小學，對基督教都有啲認識，屋企是草根階層，父親工作，母親要照顧家庭。小時候都係通山走，話壞又唔係，話好又無我份，讀書成績一般。星期六或日都有時返吓週會，對耶穌認識一般，讀到中三無讀，轉讀工業學院，當時同一班同學都很反斗，十幾歲入社團，當時覺得很好玩，但最多都係打吓交。十七、八歲出嚟做嘢，期間都沒有點犯過事，沒有吸毒習慣，可能自己玩功夫關係，知道一掂呢啲嘢就玩完。三十歲結婚，有兩個兒子、一個女兒，做裝修期間都有拍下電影，拍電影時認識咗一班手足，其中一個係劉冬青，大家兄弟感情都好好，可能拍電影成日都出生入死喇，唔覺至今都二十幾年，冬青我一直睇住佢變，都好奇怪，佢以前乜都啱都可以變到今日咁，都覺得呢個耶穌都有啲料喎。幾年前惹咗一單官司，同冬青講過，我每一次上庭佢都會出現，有呢個手足我十分開心，仲經常同我禱告，幸好最後無事。

第一次出席得勝係2012年春茗，冬青叫我去，認識咗牧師及一班弟兄姊妹，之後都叫我返得勝崇拜，最初返都會覺得會唔會好悶，出席過幾次又覺得好好，可以聽下牧師講道，及分享弟兄姊妹見證，唔覺都返咗得勝差不多三年喇，最初頭一年多位牧師都叫我浸禮，可能我自己仲認為未係時候，又吸煙、飲酒，但返得勝慢慢覺得心靈好舒服，同埋啲牧者好好。弟兄姊妹都好關心，好多時得勝嘅活動我有時間一定會去參與，返得勝最大嘅得益可能係自己好似返咗一個大家庭，我會再繼續去成長，去更加認識主耶穌。