2017 見證分享
《新角色–智慧之士》 王進業
我叫王進業，1980年出世，屋企有爸爸媽媽一個家姐，我係秀茂坪長大，因為爸爸太惡，好細個就鐘意流連係街上面，我係屋邨裏面成日比人蝦，去到中一個年因為有個小學同學加入咗社團，我有一次係球場比人蝦，我打電話比佢，佢真係拖馬黎幫我出頭，打到佢地瞓晒係度，呢次之後，我就立志加入社團，就係咁…中一嘅時候就加入咗社團，我同一般古惑仔無咩唔同，中學時期鐘意逃學，離家出走，因為成日鐘意流連係街上面，三五成群，就係咁十六歲因為爆竊，比警察捉咗，入咗壁屋監獄拋咗22日，然後被法庭判守行為一年，呢一年當然ok乖啦！
一年過去喇，我照舊同返班朋友一齊玩，開始落disco啦，大約18歲食搖頭丸，嗦K。人大咗當然要開始揾錢啦，試過幫白粉檔睇水，賣四級VCD，翻版，撈過賭船，賣過毒品(搖頭丸K仔)，做過外圍，收過數，總之基本上有錢搵我都會去做，就係咁，係23歲果年，警察代號(戈壁行動)被警察拉咗收受外圍，被判監禁兩個月，緩刑兩年。我無因為被人拉咗而乖乖做人，繼續收受外圍，同年識咗一個女仔，開始同佢拍拖，所以我開始長期落disco，就係呢段時間開始長期吸毒，24歲因為傷人再次被警察拉，呢次無咁好彩喇，因為有緩刑嘅關係，被判監禁兩個月，出返黎之後當然繼續行返以前條路，之後啲毒品癮越來越深，日日都要食，屋企又食出街又食，開始全職買賣毒品(K仔)。
05年左右，因為女朋友關係，認識到一些食可卡因嘅朋友，佢教我食，再同我講宜家興可卡因，我咪返貨諗住買囉。 點知攞咗啲貨返屋企，一試就上癮喇！賣都未賣過，日日食，唔出街唔做野，唔食飯，淨係食麵包，水果同燕窩維持營養，好快由125磅變到得一百磅，食曬成副身家，因為爛賭，搞到欠人周身債，最後梗係同個女仔分咗手啦。
大約2007年認識到一位老闆，所以過咗澳門放數，揾好多錢，但係拆散過好多家庭，害死過人，啲人係表面睇我好風光，其實搵啲錢返嚟，從來都袋唔暖，啲錢唔係輸咗係賭臺上面，就係吸咗毒，古惑仔嘅生涯就係咁，好多人都睇表面，以為做古惑仔好好，其實內裡又有幾多個真係好，簡直是萬中無一啊！
人地話一人信主，全家受惠，係真嘅。我家姐08年決志信主，我就係在這年認識到我而家嘅太太，我知道我呢位太太，係神賜比我，無呢位太太出現，我唔會去戒毒，唔會去戒毒就唔會認識神。2009年我太太有咗我骨肉。我家姐亦都係2009年9月，係播道會同福堂洗禮，因為有咗BB嘅關係，太太、家人都希望我戒毒，因為家姐已經係基督徒，所以就介紹我去福音戒毒，同年10月左右，我就入咗互愛中心浪茄戒毒村，我只入咗一個月，就偷走，以為自己掂，戒甩咗。 2010年1月就誕下我的兒子王澄鋒，當然我好快就企唔穩！又吸返毒，跟住果幾年不斷咁進出戒毒村，互愛3次、靈愛2次、晨曦會1次,每次都唔長，不斷咁跌倒，但係神無放棄過我，佢會派使者不斷出現喺你身邊幫你，我唔記得我係浪茄第幾次偷走出嚟又吸返毒，我屋企人好失望、好無助嘅時候，竟然有個舊街坊打電話比我爸爸，佢叫鵝姨，都係基督徒。 她話尋晚發夢有天使同佢講我地個家庭需要幫忙，我地兩家人好幾年都無聯絡了，佢絕對無可能知道我屋企嘅事，神第一次就係咁話俾我知佢嘅存在。
但係我咁調皮，當然無咁容易馴服繼續偷走啦！主耶穌基督，不但無嬲我，仲繼續派人嚟教導我，支持我，講解咩係真理比我聽，有劍豪叔啦！係佢帶我返得勝，我係得勝得到好多好多，Idy咁多年對我不離不棄，無論我仲係有幾壞，吸緊毒，衹要我搵佢，佢一定理我，跟住有亞視嘅Sam哥，佢教我打拳，想我恢復鬥志同信心，佢仲同我講，人生其實似一部戲。 你做道友嘅角色已經完喇，天父上帝比一個新嘅角色比你做，唔需要再做道友。我辜負咗佢地好多!
跟住我經歷過嚴重嘅交通意外，都無死到，只係擦損咗隻手，所有人都以為我呢次死唔去，會真心悔改，戒毒！點知所有嘢一切照舊，繼續做壞事，繼續吸毒！我都唔記得咗邊年邊月，有個老闆，出年薪過百萬比我仲有花紅(當然係做壞事)，叫我掉咗個十字架，聽日同佢去拜關帝，我聽日就唔聽佢電話，我同上帝講，我信你嘅，我唔會因為錢而放棄你。我就係咁，因著信耶穌而得救，當然，唔會好似變魔術咁樣，｀尋＇一聲就戒咗毒啦!人係需要一些經歷，神好愛我。係2015年尾，賜宜家嘅小寶貝以琳BB比我，因為有咗呢個小寶貝女，我係2016年嘅3月決心再戒毒，呢次我無再入戒毒村，我知道我肯定完成唔到一年課程，肯定又會偷走嘅。 我同老婆返咗大陸，生活咗四個月，返大陸嗰日，仲喺九龍塘地鐵站萬寧打售貨員，返到大陸不斷去想，不斷去諗，不斷同自己講同上帝講，我真心想戒毒，耶穌我又信咗，你比我嘅力量我有啦！我爭啲咩呢？咁多次失敗又係點解呢？爭啲決心，同埋每次失敗，我都係因為返去以前班朋友到，繼續撈偏門，所以註定失敗。 當我諗通咗嘅時候我就同神講，我返香港喇，我楂Uber返工，求你比力量我，唔好比我遇返嗰班壞朋友，我好驚，好驚我軟弱。 人係需要朋友，我既然決定唔再要舊嗰班豬朋狗友，我一定要去認識一班新嘅朋友，所以我keep住返得勝崇拜，同埋…唔得閒返教會叉下電，容乜易又跌倒啊!
係2016年9月26日，以琳BB終於出世，BB出世之後十日左右，我就去咗差館自首，係16年12月被法庭判我十四日監禁。
我呢兩年最感恩三樣嘢，第一戒咗毒，第二有咗以琳BB，第三多咗一班係得勝裏面認識嘅好朋友。 係度我想多謝我生命中最重要嘅三個人，我嘅爸爸媽媽，佢地為我付出咗好多，仲有老婆對我嘅不離不棄。我今日升咗做主角，唔使再扮道友喇！多謝你地..感謝主！
「敬畏耶和華是智慧的開端，認識至聖者便是聰明！」箴言9章10節
閱讀更多
《主尋找迷途的羊》李漢佳(Alan)
我從小學開始便是在基督教學校返學，直到中學畢業。而且在畢業後有一次同舊同學返教會，就在當晚舉手決志信主，但之後我再無返教會。
我畢業後就加入TVB工作，因為收入好加上受人影響，開始沉迷賭博，跟同事去夜總會。當時我覺得自己搵到快樂，但原來不是，因為輸錢，個人變得暴躁，生活開始轉差，要問銀行借錢，但當時我仍然覺得可以用賭去解決生活問題。去夜總會可以減壓。 當欠債情況越來越嚴重，銀行借唔到錢，我問父母借錢，最後我父母的退休金差不多被我借盡，最後我因欠債被迫破產，加上暴躁情緒，再在2003年因傷人被判入獄三個月，當時我完全迷失同無助。而且我父母亦因為我的行為，決定不再見我，甚至他們離世時都無再見我。
出獄後我生活非常困難，因為無工作無收入亦無人關心我，當時無錢，一個月只可以食麵包，而且不是每日都有得食，因此我出現自殺念頭。 但係最無助想到自殺的情況下，主的恩典降臨我身上，當時我舊同事打電話俾我，話我知TVB請人叫我返去做，我立即應承返去做。 感謝主的恩典我生活得到解決，當時我知道不可以再賭，我要改變自己，因此決定戒賭。而且要戒除所有的惡習，但係我戒除了自己的惡習後，感到失去人生最重要的事(快樂)，我開始想點樣先可以有快樂的生活。我開始係工作上搵，但搵唔到，感情上亦搵唔到。 直至我認識到Mina，因她叫我返教會，使我回想當日我亦有返過教會，而且決志過，所以我跟她返得勝堂，第一次返得勝堂在我心中有回家的感覺，因此我決定再次決志信主。 決志之後我心中開始得到平靜，而且搵到我一直想搵的平安喜樂同歡笑。 我暴躁的性格亦因為主耶穌使我改變了。 我會繼續跟隨主耶穌的教導，感謝天父的帶領，使我能返回主耶穌的身邊跟從衪，感謝得勝堂所有弟兄姊妹對我的鼓勵同關心，使我感到我都有人關心同愛護。 亦多謝莫牧師、輝牧師、何姑娘同各位弟兄姊妹對我的教導。 我會繼續努力學習主的話語，改善自己不足的地方。
感謝天父!無因為我曾經離棄而放棄我，反之還要尋回我改變我，使我成為一個新造的人。 「若有人在基督裡，他就是新造的人。舊事已過，都變成新的了。」哥林多前書 5章17節。 原來我一直用自己想法去過自己的生活，追求自己覺得正確的事，使我迷失同犯錯。 感謝天父使我明白人生不是自己作主，應該把自己交託在主耶穌手中。 耶穌對門徒曾說:「若有人要跟從我，就當捨己，背起自己的十字架來跟從我。」馬太福音16章24節。
最後感謝天父的不離不棄，給予我新的生命，一切榮耀歸於全能的天父!
閱讀更多
《重回正軌人生路》 周健華
我是周健華，信主前，我是一名井底蛙和好賭的人，讀書只是中學畢業，畢業後就在家裡的大排檔幫手。因家中我是年紀最小，所以家人很縱我，當時打遊戲機冇錢便去收銀處自己拿，因此從小到大都沒有金錢的概念。
後來因在大排檔上班的關係，認識了一位客人，就跟了他學開鎖，因師父是喜歡賭馬和夜遊，我便跟上了亂花錢的歲月，更欠下債項，後來要靠家人幫忙還債，跟著的日子又是重覆夜遊和賭錢，又再一次要家人幫忙還債，那次之後，我便努力工作賺了一點錢，又跟著朋友狂嫖濫賭的日子，當時的我是已婚的，還喜歡了別的女子，亂花錢在她身上，又自高自大，最終又是欠債，最後又是要自己慢慢的還。
因今次家人沒有再幫我了，加上女友又因我沒錢即時走了，所以當時情緒很低落和仇恨，隨後我和客人談及我的事情，她便帶我返教會，如此便來了得勝堂。 起初心情真的好了，所以便決志了，當時都返了教會好一段時間，但隨著朋友逐漸少返後，我也開始沒有再去。 當時的日子，我看多了書和聽多了電台節目，發覺自己的性格有很多不是，自己慢慢努力改過來，後來可能是神的呼喚，讓唐成鑫傳道再次叫我回教會，我便回到得勝堂了。 回到教會後，我逐漸多留心聽牧師講的道，發覺主的話很像我看書和聽電台講的道理，所以心想為什麼年輕時不早點認識耶穌，早點回教會，早點行神的道，就可以得永生。
現在我努力活在神裡面，依靠主耶穌，每天都可以帶著平安和喜樂的心情做人，什麼事情也不再懼怕，還可以將美好的福音傳給別人，盼望令別人可以早點行神的道，領受更多恩典。
閱讀更多
《下半場得勝人生》 蔡健邦
信主前：從少成長由嫲嫲照顧，單親家庭長大，直至16歲投身社會工作。但15歲那年開始接觸毒品，在投身社會工作後，無了吸毒心癮，但不幸又被朋友影響，染上賭癮。 因為比朋友出賣欠下賭債，加上身邊朋友吸毒影響之下，我又令自己的毒癮加深，可以說當其時思想混亂，心受打擊，家人也被連累。因為賭債問題，無人幫到我覺得很無助，因自己要面對所有問題，受了很大壓力，每天為債務而活，便用毒品逃避龐大壓力，每天過著行屍走肉的生活。賭、毒、拜偶像已經令我一鋪清袋。
信主經過：在行屍走肉日子中，每天過得艱難，又有思想錯亂。有一天，突然想起一位曾傳福音給我的朋友，他也是吸毒的，我當時記起他一句說話：「耶穌幫助我戒毒，還救了我性命。」當刻即時聯絡佢，他很熱心幫助我，因為他知道我想信耶穌，也建議我返教會。 到教會遇上唐成鑫傳道，他鼓勵我返得勝教會，當時立即覺得人生有一點希望，但對耶穌知識很淺薄，因為受拜祭阿嫲的觀念的影響，對信耶穌寸步難行，心想放棄信耶穌，因為不拜阿嫲係不孝，很掙扎之下，奇妙的事發生了。
同時在街上有人向我派福音單張，電話內也出現了福音的經文，我感受有耶穌叫我回家一樣，如是者，加強了信耶穌的信心，好像聖經有一句話說：「靠著那加給我力量的，凡事都能作。」 令我鼓起勇氣跟公司要求說我希望返教會，要星期二放假，事情令我喜出望外，公司竟然接納我的要求。
信主後：由返教會到現在，感覺輕鬆、開心、平安、舒服，這些感覺在我生命上不斷增加，生命再不是絶望，而是有了神而來盼望。返到得勝教會，當中知道神係到保護緊我地。幫我以前混亂思想回復清晰，糾正人生正確方向，讓我知道要珍惜家人，比我有勇氣主動關心家人。 祂又調較我的人生目標，改變自己的過去，傳福音，希望人生過得積極更有意義，生命影響生命，流露基督大愛，人生輸了上半生，人生下半場是得勝人生。
蔡健邦(左一)
閱讀更多
